मोती र वागमती

-नदीश

काकाकुलहरु छट्पटाउँदा
वागमतीको ढल पनि सफा हुँदो रैछ
इतिहासहरु खोज्दै-खोज्दै
वर्तमानका स्वप्नहरु
विगतको वास्तविकता बन्दोरैछ

जड पानीमा डुबुल्की मारेर
मोती निकाल्नेहरु
ढाडमै ढल बगाउँदारैछन्
र
सबैलाई विश्वास छ
बग्ने पानी कहिल्यै फोहर हुँदैन
त्यसैले
उनीहरुलाइ लुतो चिलाउँदैन

अर्काको वागमती बगाउनेहरु
स्वार्थी हुँदारैछन्
कहीँ यो उल्टो नबगोस्
मुहानमै ढल जम्ने गरेर
वागमती जसको हो
उसैले वगाउनुपर्छ
मोती जसको हो
उसैले टिप्नुपर्छ ।